നിക്ഷേപം ഊഹകച്ചവടമല്ല…

ഓഹരി നിക്ഷേപം പകിടകളി പോലുള്ള ഭാഗ്യപരീക്ഷണെന്ന ധാരണ തെറ്റാണ്. അറിഞ്ഞും പഠിച്ചും ചെയ്യേണ്ട നിക്ഷേപമാര്‍ഗ്ഗമാണിത്. ഓഹരിയില്‍ പണം നിക്ഷേപിക്കുമ്പോള്‍ നിങ്ങള്‍ ഏതെങ്കിലും ബിസിനസ്സില്‍ പണം നിക്ഷേപിക്കുകയാണ് ചെയ്യുന്നത്. അത് വളരുന്നതിനനുസരിച്ച് നിങ്ങളുടെ ലാഭവും വര്‍ധിക്കും. മികച്ച ഓഹരികള്‍ കണ്ടെത്തുന്നതിനുള്ള കഴിവില്ലായ്മയാണ് ചിലര്‍ക്കെങ്കിലും ഈ മേഖലയില്‍ തിരിച്ചടിയുണ്ടാവാന്‍ കാരണം.
ശ്രദ്ധിക്കേണ്ട കാര്യങ്ങള്‍: നിക്ഷേപിക്കാനുള്ള ഓഹരി ഏതാണെന്ന് കണ്ടെത്തണം.അത്യാവശ്യ കാര്യങ്ങള്‍ക്കുള്ള പണമെടുത്ത് ഒരിക്കലും ഓഹരിയില്‍ നിക്ഷേപിക്കരുത്. വാങ്ങിയ ഓഹരികള്‍ക്ക് മൂല്യം കുറഞ്ഞാല്‍ ക്ഷമയോടെ കാത്തിരിക്കണം.പ്രതിമാസം ഒരു നിശ്ചിത തുക നിക്ഷേപത്തിലേക്ക് മാറ്റിവയ്ക്കാന്‍ സാധിക്കുന്നവര്‍ അങ്ങനെ ചെയ്യുന്നതാണ് ഉചിതം.500 രൂപ മുതല്‍ പ്രതിമാസം ഇത്തരത്തില്‍ നിക്ഷേപിക്കാവുന്നതാണ്. ഓഹരി വിപണി പണക്കാര്‍ക്കു മാത്രമുള്ളതാണെന്ന ധാരണ തെറ്റാണ്.
ചിലര്‍ പറയും സമയം തീരെയില്ലെന്ന്: നിക്ഷേപം നടത്തുന്നവര്‍ രാവിലെ മുതല്‍ വൈകുന്നേരം വരെ ഇതും ശ്രദ്ധിച്ചിരിക്കേണ്ട കാര്യമില്ല. കംപ്യൂട്ടറില്‍ ശ്രദ്ധിച്ചിരിക്കാന്‍ സാധിക്കാത്തവര്‍ ആറു മാസം, ഒരു വര്‍ഷം, പത്തുവര്‍ഷം പോലുള്ള നിക്ഷേപമാര്‍ഗ്ഗങ്ങള്‍ സ്വീകരിക്കാവുന്നതാണ്. ഉദാഹരണത്തിന്. 2003ല്‍ ഫെഡറല്‍ ബാങ്ക് ഓഹരി ഒന്നിന് 30 രൂപയായിരുന്നു വില. ഇപ്പോള്‍ അതിന്റെ വില 370 രൂപയാണ്. എട്ടുവര്‍ഷം മുമ്പ് ഒരു ലക്ഷം രൂപ നിക്ഷേപിച്ച ഒരാളുടെ പണം ഇപ്പോള്‍ ഏകദേശം 12 ലക്ഷത്തോളം രൂപയായി ഉയര്‍ന്നിട്ടുണ്ടാവും. എപ്പോഴും വാങ്ങാനും വില്‍ക്കാനും സാധിക്കുമെന്നതിനാലും സ്വര്‍ണത്തെ പോലെ പണിക്കൂലി, തേയ്മാനം എന്നിവ ഇല്ലാത്തതിനാലും ഓഹരി നിക്ഷേപം ഏറെ ലാഭകരമാണ്.
അത് പഠിപ്പും വിവരമുള്ളവര്‍ക്ക് പറഞ്ഞ പണിയാണ്: ഓഹരിയില്‍ നിക്ഷേപിക്കാന്‍ സാമ്പത്തികശാസ്ത്രമൊന്നും പഠിക്കേണ്ടതില്ല. സാമാന്യബോധം, ചെലവഴിക്കാന്‍ കുറച്ചു സമയം, അറിയാനുള്ള ആഗ്രഹം എന്നിവ മാത്രമാണ് ഒരാള്‍ക്കുവേണ്ടത്. അനുദിനം ജീവിതചെലവേറിയ ഈ കാലത്ത് മികച്ച ആദായം ലഭിക്കുന്ന നിക്ഷേപമാര്‍ഗ്ഗങ്ങള്‍ സ്വീകരിക്കാതെ നിവൃത്തിയില്ലാത്ത അവസ്ഥയാണുള്ളത്. ബാങ്ക് ഡിപ്പോസിറ്റ്, പോസ്റ്റ് ഓഫിസ് എന്നീ പരമ്പരാഗത നിക്ഷേപമാര്‍ഗ്ഗങ്ങളില്‍ നിന്നു ലഭിക്കുന്ന വരുമാനം 10 ശതമാനത്തില്‍ താഴെയാണ്.
വിപണി ഇടിയുമ്പോള്‍ പണം നഷ്ടമാവും: സാധാരണക്കാരന്‍ ഓഹരി വിപണിയെ സമീപിക്കാത്തതിന് ഏറ്റവും പ്രധാനകാരണം ഈ തെറ്റായ വിശ്വാസമാണ്. വിപണി ഇടിയുമ്പോള്‍ മൂല്യം കുറയുക മാത്രമാണ് ചെയ്യുന്നത്(സ്വര്‍ണത്തിന്റെ വില കുറയുന്നതും കൂടുന്നതുമായി താരതമ്യം ചെയ്യുക). ഉദാഹരണത്തിന് കേരളത്തിലെ ബ്ലുചിപ്പ് കമ്പനിയായ വിഗാര്‍ഡ് ഓഹരികളുടെ വില വിപണിയിലിറങ്ങി ആറുമാസത്തിനുള്ളില്‍ തന്നെ 82 രൂപയില്‍ നിന്ന് 50 രൂപയായി കുറഞ്ഞിരുന്നു. ഏറെ മലയാളികള്‍ ഇതില്‍ നിക്ഷേപിക്കുകയും ഓഹരി വില കുറയുന്നതു കണ്ട് ഏറെ നഷ്ടത്തില്‍ വിറ്റൊഴിവാക്കുകയും ചെയ്തിരുന്നു. എന്നാല്‍ വി ഗാര്‍ഡ് മികച്ച കമ്പനിയാണെന്ന കാര്യത്തില്‍ നല്ല നിക്ഷേപകര്‍ക്ക് സംശയമില്ലായിരുന്നു. രണ്ടു വര്‍ഷത്തിനുള്ളില്‍ ഓഹരി വില 200 രൂപയായി ഉയര്‍ന്നു. ചുരുക്കത്തില്‍ രണ്ടരവര്‍ഷം കൊണ്ട് നിക്ഷേപ തുക ഇരട്ടിയായി. ശരിയായ തീരുമാനം, ശരിയായ നിക്ഷേപം, ശരിയായ സമയം ഇതാണ് ഓഹരിവിപണിയില്‍ നേട്ടമുണ്ടാക്കുള്ള മുദ്രാവാക്യം.
ബ്രോക്കിങ് സ്ഥാപനം എല്ലാം ചെയ്തുകൊള്ളും: ഒരു എക്കൗണ്ട് തുടങ്ങി പണം നിക്ഷേപിച്ച് എല്ലാം ബ്രോക്കിങ് സ്ഥാപനത്തെ ഏല്‍പ്പിക്കുന്ന പ്രവണത നന്നല്ല. നിങ്ങള്‍ അധ്വാനിച്ചുണ്ടാക്കിയ പണം എവിടെയാണ് നിക്ഷേപിച്ചിരിക്കുന്നത്? അതിന്റെ വില എന്താണ്? എത്ര ഓഹരി വാങ്ങി? ഇത്രയും പ്രാഥമിക കാര്യങ്ങള്‍ ഓരോ നിക്ഷേപകനും അറിഞ്ഞിരിക്കണം. തുടക്കത്തില്‍ 15-20 ശതമാനം വരെ വാര്‍ഷിക അറ്റാദായം പ്രതീക്ഷിക്കുന്ന രീതിയില്‍ നിക്ഷേപിക്കുന്നതാണ് ബുദ്ധി.
JRG Securities Pvt Ltd
Fastinfoline
Feroke Hospital Complex
Feroke,Kozhikode,673631
+91 495 3922450
+91 9947707750
+91 9400057750